పాన్ కార్డు పోయిందా? ఆన్‌లైన్‌లో డూప్లికేట్ పాన్ పొందడం చాలా ఈజీ.. ఇలా అప్లై చేయండి!

పాన్ కార్డు (PAN Card) పోయినా, దొంగతనానికి గురైనా లేదా పాడైపోయినా ఆందోళన చెందాల్సిన అవసరం లేదు. ఇప్పుడు ఇంటి నుంచే ఆన్‌లైన్ ద్వారా డూప్లికేట్ పాన్ కార్డు (Duplicate PAN Card) కోసం సులభంగా దరఖాస్తు చేసుకోవచ్చు. అప్లై చేసిన వెంటనే అత్యవసర అవసరాల కోసం ఈ-పాన్ (e-PAN) డౌన్‌లోడ్ చేసుకొని వినియోగించుకోవచ్చు. ఆ తర్వాత కొత్త ఫిజికల్ పాన్ కార్డు నేరుగా మీ చిరునామాకు పోస్టు ద్వారా పంపబడుతుంది.

డూప్లికేట్ పాన్ ముఖ్యాంశాలు

ఎలాంటి పరిస్థితుల్లో అప్లై చేయాలి?

డూప్లికేట్ పాన్ కార్డుకు దరఖాస్తు చేసినప్పుడు మీ పాత పాన్ నంబర్ మారదు. కేవలం కొత్త కార్డు లేదా ఈ-పాన్ మాత్రమే జారీ అవుతుంది. ఈ క్రింది పరిస్థితుల్లో రీప్రింట్ కోసం దరఖాస్తు చేసుకోవచ్చు:

• పాన్ కార్డు పోయినప్పుడు లేదా ఎవరైనా దొంగిలించినప్పుడు.
• కార్డు పాడైపోయి, వివరాలు చదవడానికి వీల్లేకుండా ఉన్నప్పుడు.
• ఫిజికల్ కార్డు పూర్తిగా దెబ్బతిన్నప్పుడు.

ఆన్‌లైన్‌లో అప్లై చేసే విధానం

1. ముందుగా అధికారిక పాన్ సర్వీస్ పోర్టల్ (PAN Service Portal) ఓపెన్ చేయాలి.
2. అందులో ‘Reprint PAN Card’ లేదా ‘Reprint/Correction’ ఆప్షన్‌ను ఎంచుకోవాలి.
3. మీ పాన్ నంబర్ లేదా ఆధార్ నంబర్ నమోదు చేయాలి.
4. రిజిస్టర్డ్ మొబైల్ నంబర్‌కు వచ్చిన ఓటీపీ (OTP) ఎంటర్ చేసి వెరిఫై చేయాలి.
5. నిర్ణీత రుసుమును ఆన్‌లైన్ ద్వారా చెల్లించాలి.
6. అప్లికేషన్ సబ్మిట్ చేసిన తర్వాత వచ్చే అక్నాలెడ్జ్‌మెంట్ నంబర్ (Acknowledgement Number) భద్రపరుచుకోవాలి. దీని ద్వారా అప్లికేషన్ స్టేటస్ ట్రాక్ చేయవచ్చు.

కావాల్సిన వివరాలు

• పాన్ నంబర్, ఆధార్ నంబర్.
• యాక్టివ్‌గా ఉన్న రిజిస్టర్డ్ మొబైల్ నంబర్.
• పేరు లేదా చిరునామాలో మార్పులు చేయాలనుకుంటే, వాటికి సంబంధించిన ధృవీకరణ పత్రాలు (Proof Documents).

గుర్తుంచుకోవాల్సిన ముఖ్యమైన విషయాలు

• ఇప్పటికే పాన్ నంబర్ ఉంటే, కొత్త పాన్ కార్డు కోసం దరఖాస్తు చేయకూడదు.
• ఒకటి కంటే ఎక్కువ పాన్ కార్డులు కలిగి ఉండటం ఆదాయ పన్ను (Income Tax) నిబంధనల ప్రకారం చట్టవిరుద్ధం.
• ఆన్‌లైన్ ప్రక్రియ పూర్తి కావాలంటే మీ రిజిస్టర్డ్ మొబైల్ నంబర్ తప్పనిసరిగా పని చేస్తూ ఉండాలి.